Pas tërheqjes së nipit në përfundim të mandatit, kryetar partie zgjidhet daja. Është fjala për PD-në në Gjirokastër, e cila sot e në vijim do të drejtohet nga Dasho Aliko, ish-kryetar i Komunës së Lazaratit. Ai mori shumicën e votave përballë kandidatit Gjergji Dudi.

Ky ka qenë lajmi i ditës se djeshme i cili kaloi si pa u vënë re, por që është domethënës për të kuptuar politikën e ditës në Tiranë.

Pse na qënkërka kaq i rëndësishëm ky lajm për të kuptuar politikën e madhe?

Sepse, Partia Demokratike dhe të gjithë eksponetët e saj me në krye Lulzim Bashën, kanë patur deri dje si simbol të luftës së saj politike, luftën kundër kanabisit, ku nuk kanë lënë njeri pa sulmuar  si të lidhur me këtë.

Lulzim Basha ka mbajtur si flamur të tijin luftën ndaj kanabisit deri dje, ku është hedhur në sulm duke predikuar moral se partia e tij ishte e pastër dhe se kundërshtarët e tij ishin të lidhur me këtë fenomen.

Por, këto janë vetëm ato që ka thënë Lulzim Basha, jo ato që ka bërë. E nga e thëna në të bërë, është në mes një det i tërë, thotë populli.

Lulzim Basha dje ka vënë kryetar partie në Lazarat, Dasho Alikon, ish-kryekomunarin e tij në këtë fshat, në kohën e lulëzimit të kanabisit.

Aliko mbart me vete stigmën e një ish-kryetari komune të një zone që ishte shndërruar në kryeqytetin europian të kanabisit. Kishte apo ajo përgjegjësi Dasho Aliko për kultivimin e kanabisit, kjo është një çështje që duhet ta provojë drejtësia, madje për këtë atij i është bërë kallëzim penal për ‘shpërdorim detyre’ 4 vjet më parë.

Lulzim Basha ka qenë ministër i Brendshëm kur Lazarati ishte simboli i kanabisit ne Europe, e Dashoja, kryekomunar!

Por në këtë histori nuk ka faj Dasho, sepse ai do të jetë në politkë për arsyet e tij.

Por vendosja e tij në krye të PD-së atje, është në fakt dëshmia se Basha ndryshe flet e ndryshe bën. Ne media del dhe bën si profet i luftës kundër kanabisit, ndërsa nga ana tjetër gradon në krye të partisë së tij, atë që qeveriste Lazaratin kur ky i fundit ishte simbol i drogës në Europë.

Sigurisht që nuk ka qytetar që befasohet nga fakti që Basha tjetër bën e tjetër thotë. Askush nuk është i habitur nga dyfytyrësia e Bashës./LEXO.al