Kryetari i Grupit Parlamentar Taulant Balla së bashku me Sekretarin për Marrëdhëniet me Shoqërinë Civile në PS, Alfred Peza, deputetë dhe Kryetarin e Bashkisë së Elbasanit morën pjesë në Forumin e Debatit Qytetar të organizuar në Elbasan. Forumi Qytetar u drejtua nga Z. Arbër Gjeta i cili vlerësoi praninë e të gjitha grupeve të interesit në këtë tryezë si dhe garancinë që PS mbështet këtë iniciativë, rrjedhimit edhe problematikat që do të dalin prej saj. Balla theksoi rëndësinë e këtyre forumeve të debatit qytetar në mungesë të një opozite:

“Për ne formësimi i një forumi debati qytetar këtu në Elbasan është i domosdoshëm. Në fakt, gjithmonë në Elbasan është treguar një pjekuri dhe një lloj bashkëjetese politike e cila ka qenë dhe mbetet një model sesi Elbasani mund të reflektojë më shumë edhe drejt Tiranës, aty ku ka nevojë për komunikim, duke lënë mënjanë ndasitë politike. Por ky formun që ne nisin këtu e ka burimin nga nevoja e pas zgjedhjeve të 30 Qershorit. E them këtë sepse zgjedhjet e 30 qershorit nuk ishin zgjedhje tipike, ishin atipike. Padyshim që, qoftë në punën e përditshme të Kryetarit të Bashkisë, qoftë në punën e përditshme të Këshillit Bashkiak është shumë e nevojshme që të ketë një konsultim me ekspertë të fushave të ndryshme.

Për mua e rëndësishme është të diskutojmë në forum çështje që lidhen me ligjvënien, por për Kryetarin e Bashkisë janë më shumë çështje që lidhen më adresimin e problematikave që ka qyteti. Në mungesë të një opozite është shumë e rëndësishme që ne të ulemi në këtë forum herë pas here për të diskutuar.” Nga ana tjetër Sekretari për Marrëdhëniet me Shoqërinë Civile në PS, Alfred Peza shpjegoi rëndësinë që kanë për PS të tilla forume të debatit qytetar:

“Jam në pozicionin e Sekretarit për Marrëdhëniet me Shoqërinë Civile në PS, prandaj jam personi që në emër të PS, po e nxis këtë proces. Por PS, nuk bën pjesë në forumet e debatit qytetar, ato janë forume të qytetarëve. Në udhëzimin që ne u kemi dërguar të gjithë forumeve të debatit qytetar, ne ndalojmë pjesëmarrjen e anëtarëve dhe drejtuesve të PS në këto forume pasi një anëtar/drejtues i PS e ka linjën e vet ku të shkojë të ankohet apo të adresojë një çështje. Nga ana tjetër, garanci se këto forume janë të qytetarëve, është fakti se në në këtë proces kemi parasysh zbatimin e disa neneve të ligjit për Vetëqeverisjen Vendore. Pra, ne kemi një detyrim ligjor për ta nxitur procesin e vetëorganizimit qytetar pasi ky ligj i nxit qytetarët dhe i ofron mundësinë të jenë pjesë e vendimmarrjes në çështje shumë të rëndësishme.”

Ideja e adresimit nëpërmjet këtij forumi, të problemeve dhe halleve të komunitetit, drejt përfaqësuesve të pushtetit lokal e qëndror, ka rritur entuziazmin se projekti do të funksionojë në të mirë të së ardhmes së tyre.