Zëvendëskryeministri Erion Braçe uron shqiptarët në ditën e Kurban Bajramit, ndërsa thekson se dita e sotme është një ditë vlerash.

“Çdo shqiptari mysliman, çdo shqiptari që realisht jeton si besimtar çdo ditë, në paqe e me parimet e tij, dua t’i uroj: gëzuar Kurban Bajramin!. Ju dua më të mirën secilit ndër ju, për vete e familjet tuaja, duke nisur nga prindërit deri tek fëmijët, çdo ditë! Të jeni bashkë, me të njëjtin e me të ndryshmin, pavarësisht nga mosha, gjinia, besimi, bindja, mbi të gjitha nga statusi social, pasuror-pa u ndarë kurrë në të varfër e të pasuar, gjetur pikën e bashkimit tek drejtësia e njëjtë për të gjithë, tek barazia”, shprehet ai.

Duke e konsideruar këtë ditë të shenjtë si ditë vlerash, Braçe thekson se disa politikanë nuk jetojnë si ju, jetojnë në rezidenca dhe vijnë tek ju me besimin se Zoti do i fal, ligji do i harrojë se bënë sevap.

“Këto janë vlerat, ato duhet të na bashkojnë, edhe si sakrificë! Mos harroni, sot është një ditë vlerash, nuk është një ditë sevapi. Sevapi është i shkurtër, çështje minutash instrument i atyre që nuk arrijnë dot tek vlerat, nuk jetojnë për to e me to, por e kanë kurajon të bëjnë si Zot një herë, e flasin në emër të tij, herën tjetër! I dalloni lehtë; Nuk jetojnë si ju, jetojnë larg nga ju në rezidenca për sërën e tyre e të paarritshme nga ju, kujtohen për ju sa here ju keni në dore fatin e pushtetit ekonomik e politik për ta e jo vetëm; Afrohen me ju me besimin idiot se Zoti do i falë për mënyrën si jetojnë, ligji do i harrojë së bëjnë sevap! Janë banditë gjithfarësh që nuk jetojnë dot me parime e pa krime; Janë politikane pa din e pa iman; Janë para shumë që e kanë zor të paguajnë për shoqërinë detyrime fiskale por besojnë si të marrë se sevapi do u shtojë paratë, jo do ju ndihmoje ju!” , thekson ai.

“Refuzojeni sevapin e tyre! Nuk keni nevojë për ta. Ju keni njeri-tjetrin, ndani me njëri-tjetrin parimet, vlerat dhe gjithçka keni! Do jeni shumë më të lumtur e gjithmonë bashkë kështu! Jo një ditë, çdo ditë! Gëzuar të gjithëve në Cerma, Grabian, Divjakë-Kodër e fushë, Remas, Gradishte, Allkaj, Krutje, Bubullime, Kolonjë, në të gjithë Lushnjen, Berat e Korçe, kudo!”, përfundon urimin e tij, zv.kryeministri Braçe.