Nga Alfred Peza

Pas zgjedhjeve të 30 Qershorit, skena politike shqiptare është bërë më e paqtë në dukje, por jo më pak vibrante së në kohën e molotovëve, brenda saj. Shfaqja mbaroi dhe spektatorët ia vendosën notën secilit prej protagonistëve të saj. Edi Rama deklaroi pas mbledhjes së Kryesisë, se zgjedhjet e radhës janë në vitin 2021 dhe pasi analizoi rezultatin, nisi punën për fushatën e zgjedhjeve brenda sturkturave të Partisë Socialiste.

LSI ka nisur ndërkohë që të flasë me heshtjen e Monika Kryemadhit. Pas hallakatjeve haluçinante, Ilir Meta duket se e ka kuptuar që është më mirë të ketë një fund me tmerr kushtetues për të, sesa një tmerr pa fund për dinjitetin e institucionit të kreut të shtetit. Ndërsa Lulzim Basha, atë që nuk e bëri përgjatë dy viteve, deklaroi se do e bëjë tani në dy muajt e pushimeve verore, me riorganizimin e PD për ta bërë gati për zgjedhje.

Ekranet janë të lodhura këto ditë,- siç do të thoshte Ismail Kadare. Pultet kanë nevojë për bateri të reja. Spektatorët u shpërndanë nëpër plazhe. Tifozët vazhdojnë të bëjnë komentet e tyre në rrjetet sociale, në kafenetë e lagjeve ose nën çadrat e plazheve. Ndërsa “nxitësit e tifozëve”, ose përndryshe opinionbërësit, janë duke shijuar frutet e punës së tyre kryesisht nëpër plazhe ekzotike jashtë Shqipërisë, në pritje të “revolucioneve” të radhës në Tiranë.

Ndërkombëtarët përshëndetën triumfin e sistemit mbi antisistemin, institucionalizmit mbi rrugën e rrugës dhe fitoren e votës mbi skenaret e dhunës për marrjen e pushtetit në tavolinë. Për ta është e qartë se e ardhmja kalon mbi rikonfirmimin e mbështetjes pa kushte të reformës në drejtësi nga të gjitha partite politike në Shqipëri, realizimin e reformës së re zgjedhore ku të adresohen të gjitha pretendimet, duke e ftuar opozitën që ti rikthehet jetës normale në institucionet politike dhe demokratike të vendit.

Pas kësaj, “Opozita e Bashkuar” do të ketë plot dy vite në dispozicion, deri në qershorin e 2021, për tu riorganizuar “me qetësi dhe dashuri“, në mënyrë që të bëhet gati për të garuar me ekipin, programin dhe platformën e saj. Sali Berisha, Lulzim Basha, Ilir Meta dhe Lulzim Basha vazhdojnë ti gënjejnë përkrahësit e tyre, kur u thonë se do të ketë zgjedhje të parakohëshme në Shqipëri.

Kjo mazhorancë, ky Parlament dhe qeveria e dalë prej tyre, janë legjitime sepse kanë dalë nga zgjedhjet e gjithpranuara prej tyre, të çertifikuara 7 vota me 0 nga KQZ dhe të deklaruara plotësisht legjitime nga OSBE/ ODIHR dhe partnerët e tjerë ndërkombëtarë më 2017. Ndaj, edhe mandati i Qeverisë “Rama” është jo vetëm legjitim, por edhe mëse normal. Që do të thotë se ai është një mandate i plotë 4 vjeçar dhe se përfundon, vetëm në vitin 2021.

Zgjedhjet e ardhshme do të zhvillohen brenda periodicitetit normal që përcakton Kushteta e Republikës së Shqipërisë, edhe si një kundërpërgjigje tjetër ndaj skenarit të opozitës së rrugës për 30 Qershorin. Jo vetëm zgjedhjet lokale megjithë djegien e mandateve, daljen nga sistemi dhe mosfutjen në zgjedhje të “Opozitës së Bashkuar” u zhvilluan në kohën e caktuar, por edhe zgjedhjet e ardhshme parlamentare do të zhvillohen në kohën e caktuar.

Shqipëria është e dënuar ti zhvillojë zgjedhjet e ardhshme, krejt normalisht, në qershorin e vitit 2021. E kundërta thjeshtë dhe vetëm sa do të legjitimonte skenarin e opozitës, do ta legalizonte precedentin e kërkuar me çdo çmim deri tani prej saj dhe kjo do të ishte madje edhe më e dëshme sesa moszhvillimi i zgjedhjeve më 30 Qershor.

Vetëm kjo është mënyra për të rikonfirmuar përfundimisht se jemi një demokraci funksionale dhe jo një shtet i dështuar, që mund të meret peng nga skenaret e rrugës. Ndaj Partisa Demokratike dhe Lulzim Basha po bëjnë shumë mirë që i kanë urdhëruar strukturat drejtuese, që të mos bëjnë pushime verore. Sepse ajo çfarë po ndodh me riorganizimin brenda tyre, është thjeshtë halli i Lulit dhe i partisë dhe jo halli i Shqipërisë!