Opozita paralajmëron intensifikim të protestave pas tubimit të 13 prillit. Në një intervistë për A2 CNN, nënkryetari i PD, Edmond Spaho tha se demokratet do përdorin çdo mjet për të mos lejuar mbajtjen e zgjedhjeve fasadë në 30 qershor.

Pas tubimit 13 prillit, paralajmërimi i opozitës është për intensifikim të protestave. Përkundër qëndrimit të kryeministrit Edi Rama, pikërisht ditën e protestës, se zgjedhjet do të mbahen në 30 qershor, nënkryetari demokrat, Edmond Spaho thotë se opozita do te përdorë çdo mjet për të mos lejuar zgjedhje fasadë.

“Zgjedhje në qershor nuk ka për të pasur. Fakti që po zhvillojmë protesta qytetare tregon se të gjitha format e mundshme, në varësi të zhvillimeve politike mund të merren në konsideratë”, tha ai.

Spaho i kërkon edhe faktorit ndërkombëtar të parandalojë përshkallëzimin e situatës.

“Duhet të parandalojë përshkallëzimin e situatës dhe përsëritjen e skenarëve, të cilët asnjeri nuk ka dëshirë të shfaqen”, u shpreh Spaho.

Me këtë, ai la të nënkuptohet dhuna.

Partia Demokratike tashmë e ka humbur durimin me ndërkombëtarët dhe ndjehet e injoruar, pasi si SHBA, ashtu edhe BE e Gjermania në veçanti, e kanë thënë qartë që nuk ka krizë politike në vend, pasi qeveria është legjitime dhe djegia e mandateve nga opozita, një akt i papranueshëm.

Për më tepër, ndërkombëtarët kanë kërkuar zhvillimin e zgjedhjeve vendore rregullisht më 30 qershor.

Ndaj, më shumë se me Ramën, PD duket se inatin e ka me ndërkombëtarët, që nuk iu kanë lënë asnjë shteg për të negociuar, por iu kanë treguar vetëm një rrugëzgidhje, atë të hyrjes sërish në sistem, duke marrë pjesë në zgjedhjet e 30 qershorit.