Nga Altin Ketro

Pas një sërë protestash të opozitës të cilat e kanë pasur startin që nga 16 janari i këtij viti, në fjalorin e saj ka hyrë një terminologji e re duke e identifikuar ministrin e Brendshëm si “Lleshë kimiku”.

Kjo nofkë që i është veshur zotit Lleshaj vjen për faktin se opozita beson që ai është urdhëruesi i përdorimit të gazit lotsjellës gjatë protestave të dhunshme të saj

Për opozitën, Policia e Shtetit nuk ka Drejtor të Përgjithshëm, nuk ka as plan masash për çdo përshkallëzim të situatës, por sipas saj, policia vepron në çdo situatë me urdhra të dhëna drejtpërdrejt nga ministri.

Është e drejta e opozitës të besojë versionin e saj, gjë që e ka konkretizuar edhe me dy kallëzime penale për ministrin Lleshaj, pikërisht për rastin e përdorimit të gazit lotsjellës. Megjithatë nuk mund të lë pa përmendur në këtë rast një thënie kuptimplotë të kryeministrit Rama, i cili, tek ndodhej nën një agresion akuzash të pabaza nga opozita ka thënë: “Ju (opozita) na akuzoni ne për gjëra që ose i keni bërë vetë në të kaluarën, ose i keni pasur ndërmend t’i bëni”.

Dhe, në këtë kontekst, është shumë interesante që opozita e ka personalizuar këtë çështjen e përdorimit të gazit lotsjellës me emrin e zotit Lleshaj. Bile më tingëllon bukur kur e quajnë edhe “Lleshë kimiku”. Kam arsye të fortë që ta besoj këtë version të sajin.

Për të qenë sa më konkret, do më duhet që në këtë rast të sjell shembuj krahasues për situata pak a shumë të njëjta, me personazhe të njëjtë, por me anë të kundërta të fuqisë politike.

Më 21 janar 2011, ministër i Brendshëm ishte Lulzim Basha. Atë ditë ai ndodhej bashkë me kryeministrin Berisha në selinë e kryeministrisë. Në bulevard ishte duke u organizuar një demonstratë nga opozita e kohës. Pjesëmarrja ishte masive dhe ndër demonstruesit kishte një mllef të fortë karshi qeverisë jo thjesht nga nxjerrja në medie e një video-përgjimi me objekt zëvendëskryeministrin, por edhe për shumë probleme të akumuluara përgjatë keqqeverisjes 6 vjeçare të Berishës. Fundi i demonstratës pati një bilanc të hidhur me 4 qytetarë të vrarë dhe dhjetëra të plagosur.

Vetvetiu lind natyrshëm pyetja për secilin prej viktimave. Çfarë rreziku i kanoste godinës së kryeministrisë Aleks Nika që u vra diku 70 metra nga gardhi?! Çfarë rreziku i kanoste godinës së kryeministrisë Hekuran Deda që ndodhej në vendqëndrimin e gazetarëve 50 metra larg nga gardhi?! Po Faiku e Ziveri, ç’rrezik paraqisnin?

E pra, nën shembullin e opozitës së sotme që e konsideron ministrin Lleshaj si “Lleshë kimiku”, për analogji i bie që ish-ministrin e Brendshëm Basha ta quajmë “Bashë killer-i”. Është përcaktimi që i shkon më përshtat, për sa kohë që, sipas opozitës, ministri i Brendshëm është vendimmarrësi për përdorim e gazit lotsjellës sot, praktikisht është ai që ka urdhëruar edhe vrasjet dje.

Janë disa elementët që përdor policia për përballimin e turmave. Nga ajo që kam parë nga demonstrata e 21 janarit 2011 dhe nga protestat e fillim vitit 2019, kam nxjerrë 5 elementë që janë përdor:

1. Shkopi i gomës

2. Makinat ujë-hedhëse

3. Gazi lotsjellës

4. Shkrepje e armëve në ajër

5. Goditje me armë me pasojë vdekjen e protestuesve.

Ndër këto 5 elementë, më rezulton se policia e djeshme që urdhërohej nga Lulzim Basha ka përdorur kundër opozitës PS, të pesë elementët e mësipërm. Ndërkohë që policia e sotme që urdhërohet nga Sandër Lleshaj ka përdorur kundër opozitës PD, vetëm elementin 3 dhe pjesërisht elementin 2.

Kanë kaluar 8 vite nga janari 2011 dhe mbase disa i ka lënë kujtesa dhe këto 5 elementë që ka përdorur dikur kundër opozitës policia e Lulzim Bashës janë harruar. Por mjafton të klikoni në YouTube dhe aty do gjeni me dhjetëra materiale video si për përdorimin e dy makinave ujë-hedhëse në bulevard, përdorimin e gazit lotsjellës me po të njëjtin efekt si sot jo vetëm kundër demonstruesve por edhe ndaj gazetarëve që ndodheshin tek Kullat Binjake, përdorimin e shkopinjve të gomës pasi u shpërnda demonstrata duke i përndjekur qytetarët deri tek ambientet e brendshme të Kullave Binjake e zonën përreth, si dhe pjesët më tragjike: 4 mijë plumbat qorr në ajër dhe 4 në shënjestër në mish njeriu.

Duke qenë se ish-ministri Basha ka një bilanc kaq të hidhur me opozitën, është hipokrizi e neveritshme prej tij që të fyejë homologun e tij Lleshaj i cili ka përdor 1/5 e atyre që ka përdorur ai.

Gazi lotsjellës në situata kur turmat tentojnë mësyjnë për të hyrë në institucionet kushtetuese të vendit, është mjeti më paqësor dhe demokratik që shmang dëmtimet e rënda fizike ndaj protestuesve në raport me ato që shkakton shkopi i gomës, apo përdorimi i armëve të zjarrit. Gjithashtu ai shërben edhe për sigurinë fizike të vetë ruajtësve të rendit pasi shmang përballjen trup më trup me huliganët, i mbron nga rreziku i mjeteve piroteknike e bombave molotov, si dhe shiut të gurëve.

Protestat e organizuara nga Lulzim Basha janë të vetmet protesta në këto 28 vjet që pjesëmarrësit e shprehin revoltën e tyre kundër qeverisë me komandë. Marrin urdhër dhe përplasën me policinë për të çarë kordonin policor për të mësyrë institucionet e larta shtetërore, marrin kundër-urdhër dhe tërhiqen. Marrin urdhër dhe hedhin me dhjetëra objekte piroteknike apo bomba molotov ndaj policisë duke ua rrezikuar seriozisht jetën, marrin kundër-urdhër dhe qetësohen. Marrin urdhër dhe i sulen për ta pushtuar kryeministrisë, marrin kundër-urdhër dhe shpërngulen tek Kuvendi.

Pyetja e vetme që doja t’i bëja Lulzim Bashës me këtë rast, është: Ju, Lulzim Basha, nëse do ishit kryeministër dhe kushdo opozitë do tentonte të mësynte selinë tuaj dhe Kuvendin e Shqipërisë, çfarë mjetesh do përdornit kundër turmës: Pesë elementët e dikurshëm të Lulzim Bashës? Elementin e tretë të zotit Lleshaj? Apo do i linit turmat t’i shkrumbonin institucionet? Si sfidant për kryeministër, keni detyrim të jepni një përgjigje.