“Pogradeci ka nevoja urgjente dhe strategjike për të cilat kam gati një program”.

Kështu ka deklaruar në një intervistë për ERTV nga Pogradeci, kandidati socialist për kryetar të kësaj bashkie, Ilir Xhakolli, teksa prezantoi platformën e tij për zhvillimin e qytetit liqenor.

«Në radhë të parë kemi një plan për liqenin, sepse sot vazhdojnë të derdhen mbeturina dhe ujërat e zeza të njësive administrative. Unë kam projekt për të rregulluar sistemin e ujërave të zeza të njësive Bucimas dhe Udenisht dhe tek përrenjtë që derdhen në liqen. Operatori që do mirëmbajë apo pastrojë qytetin, do ta ketë të detyruar të blejë një pajisje për pastrimin e bregut të liqenit. Ky është kusht që liqeni të jetë i mirëmenaxhuar », tha Xhakolli.

Ish deputeti që sot kërkon të menaxhojë Pogradecin, tha se «qyteti ka vuajtur për një shëtitore buzë liqenit ose një lungo-gjol sic u shpreh Kryeministri, e cila do të fillojë nga hyrja e Pogradecit deri në Tushemisht».

Sipas Xhakollit, emergjente është edhe ndërhyrja në fshatrat e Pogradecit pasi nga 73 fshatra të bashkisë, 53 prej tyre kanë problem me ujin e pijshëm, ujërat e zeza dhe kanalet vaditëse.

Lidhur me mbrojtjen dhe promovimin e trashëgimisë kulturore, Xhakolli tha se do të rindërtohet rruga që të con në kalanë e qytetit dhe zhvillimi i fshatrave turistikë si Lini.

« Ne do të rivitalizojmë edhe sportet e vjetra dhe lojërave të ndryshme në liqen. Qyteti ka qënë qyteti më i zymtë nga të gjithë edhe në rastet e festave, sepse nuk ka pasur vëmendje nga bashkia e Pogradecit. Në projektin tonë kemi rikonstruksionin e dy lagjeve të vjetra të Pogradecit, mes tyre edhe rruga Naim Frashëri », përfundoi Xhakolli.