Kryeministri i Kosovës, Ramush Haradinaj në një postim në Facebook, ka ritheksuar mbështetjen e Gjermanisë për liberalizimin e vizave për Kosovën. Haradinaj shkruan se mbështetja është konfirmuar nga ministri i Brendshëm i Gjermanisë, Seehofer i cili e konsideron të justifikueshme kërkesën e kosovarëve për të lëvizur të lirë. Gjithashtu ministri gjerman këmbëngul në kriteret e nevojshme që Kosova duhet të përmbushë për këtë proces.

“Gjermania edhe njëherë konfirmon mbështetjen e Kosovës për liberalizimin e vizave. Në publikimin e radhës të FAZ, theksohet mbështetja e Ministrit të Brendshëm të Gjermanisë, Seehofer për procesin e liberalizimit të vizave, duke e konsideruar të justifikueshme kërkesën e kosovarëve për të lëvizur të lirë dhe duke këmbëngulur që Kosova përmbushë kriteret e nevojshme për këtë proces.

Një mbështetje të madhe këtij procesi i ka dhënë edhe deputeti i Partisë së Gjelbër Manuel Sarrazin, derisa në korrik të 2018-tës, Komisioni i BE-së konfirmoi se Kosova ka përmbushur të gjitha kërkesat, e po të njëjtin vlerësim vendi e mori edhe nga Parlamenti Europian. Tani Kosova ka krijuar ekipin e saj për të bashkëpunuar me Qeverinë gjermane, që ky proces të finalizohet sa më parë. Kosovarët, tashmë e kanë marrë PO-në e madhe nga Gjermania, për ta jetësuar të drejtën e tyre për lëvizje të lirë.

Urime Kosovë”, ka shkruar në Facebook, Ramush Haradinaj.