Sekretari i Përgjithshëm i Partisë Socialiste, Taulant Balla gjatë takimit përmbyllës të fushatës elektorale në Kamëz ka deklaruar se SHBA sapo i kanë vendosur vulën e noterisë 30 Qershorit, të ngjashme me vulën për të mos hyrë më Sali Berisha në SHBA.

Gjatë takimit me banorët e Kamzës së bashku me kandidatin e Partisë Socialiste për këtë bashki, Rakip Suli, Balla u shpreh se duhet të jetë e qartë si për Lulin dhe Xhelalin se 30 Qershori është një ditë e rëndësishme për Shqipërinë.

“Vota është e shenjtë dhe është e popullit. Nuk del dot sot as Ilir Meta, as Sali Berisha, as Lulzim Basha e Monika Kryemadhi tu heqin të drejtën shqiptarëve për të votuar. E drejta për të votuar është një e drejtë që e kemi fituar në vitin 1990. Këtu në Kamëz 30 Qershori është një moment historik çlirimi nga keq qeverisja lokale dhe peng-marrja politike e PD-së. Me 30 Qershor shqiptarët duhet të ndëshkojnë me votë katër politikanët, Berisha-Meta-Kryemadhi-Basha. Për herë të parë SHBA ka treguar me gisht emrat e dy politikanëve Basha dhe Kryemadhi. Keqardhje për degradimin anti demokratik të Partisë Demokratike. SHBA, BE dhe OSBE njohin vetëm 30 Qershorin”, deklaroi Balla.

Nga Kamza Balla i bëri thirrje çdo punonjësi të bashkisë Kamëz që të mos përdoret më nga Xhelal Mziu dhe tutorët e tij politike. “Çdo krim zgjedhor do të ndëshkohet ashpër nga Ligji dhe Drejtësia”, u shpreh Balla.